Марат Айзатуллин Татарстан икътисады үсешен тәэмин итү өчен эшлекле климатны яхшырту буенча Татарстан Республикасы Министрлар Кабинеты утырышында чыгыш ясады
Татарстан Республикасы инвестицион климатны яхшырту буенча актив эшне дәвам итәчәк. Бу ресурслар, финанслар таләп итә, без әзер, дип белдерде бүген Татарстан Республикасы Президенты Рөстәм Миңнеханов Татарстан Республикасы икътисадын үстерүне тәэмин итү өчен эшлекле климатны яхшырту буенча ТР Министрлар Кабинеты утырышында.
Утырышны Татарстан Республикасы Премьер-министры Алексей Песошин уздырды.
Чарада "Яңа проектларны алга этәрү буенча стратегик инициативалар агентлыгы" АКБО генераль директоры Светлана Чупшева катнашты. Утырышка видеоконференция режимында республика муниципалитетлары башлыклары да кушылды.
Алексей Песошин искә төшергәнчә, Татарстан Россия Федерациясе субъектларында инвестицион климат торышының Илкүләм рейтингында икенче урынны алган (2020 ел нәтиҗәләре буенча I урынны – Мәскәү, II урынны –Татарстан Республикасы, III урынны – Төмән өлкәсе; 2019 ел нәтиҗәләре буенча I урынны-Мәскәү, II урынны-Татарстан Республикасы).
"Үсеш аз түгел, әмма мөһиме башка нәрсә. Безнең һәркайсыбыз илкүләм рейтингның эшчәнлегебезне бәяләү инструменты гына булуын аңлый. Ә төп максат - республикада бизнес алып бару өчен мөмкин кадәр уңайлы шартлар булдыру», - дип ассызыклады Алексей Песошин.
Светлана Чупшева «РФ субъектларының инвестицион җәлеп итүчәнлеге илкүләм рейтингы» проекты үсеше һәм Татарстан Республикасының ирешкән нәтиҗәләре турында сөйләде. Ул ассызыклаганча, инвестицион җәлеп итүчәнлекнең илкүләм рейтингы төп күрсәткеч булып тора. Рейтинг инде 7 ел дәвамында төзелә. Светлана Чупшева рейтингның дүрт төп юнәлешен искә төшерде: регулятор мохит, бизнес өчен институтлар, инфраструктура һәм ресурслар, кече эшкуарлыкка ярдәм.
Татарстан берничә ел дәвамында лидер иде һәм илкүләм рейтингта 1-2 урында тора, дип искәртте ул. Аның сүзләренә караганда, Татарстан шулай ук инвестицион климатны яхшырту өчен күп кенә иң яхшы тәҗрибәләрне һәм карарларны бирде, бу - электр челтәрләренә тоташтыру, төзелештә рөхсәт алу, кече бизнеска ярдәм итү инструментлары һәм башкалар.
Светлана Чупшева шулай ук хәбәр иткәнчә, Россия Президенты Владимир Путин йөкләмәсе буенча икенче рейтинг эшләнгән – бу федерация субъектларында тормыш сыйфаты рейтингы. Ул илкүләм рейтингка өстәмә булачак һәм үз эченә медицина, социаль яклау, мәгариф, торак, дәүләт хезмәтләре һәм сервислар, үз эшеңне ачу өчен мөмкинлекләр һ. б. күрсәткечләрне ала.
"Без быел беренче тапкыр аны күзәтчелек советына һәм Россия Федерациясе Президентына ноябрь аенда тәкъдим итәчәкбез. Ул төбәк халкы, эшкуарлар һәм инвесторлар өчен мөһим булган әйләнә-тирә мохитне комплекслы бәяләү өлешендә инвестицион рейтингны тулыландыра", - диде Светлана Чупшева.
Алексей Песошин утырыш барышында билгеләп үткәнчә, республикада инвестицион климатны яхшырту өчен күп нәрсә эшләнә. Аерым юнәлешләр буенча безнең позицияләр яхшырды, диде ул, бу-финанс ярдәменең сыйфаты һәм үтемлелеге, электр энергиясе челтәрләренә тоташтыру, эшкуарларның юл челтәрләре, телекоммуникацион һәм инвестицион инфраструктура белән канәгатьлеге, бизнеска басым дәрәҗәсе кимеде, бизнеска ярдәм итүнең оештыру механизмнарын бәяләүче күрсәткечләр саклап калды. Шуның белән бергә, төзелешкә рөхсәт бирү, электр челтәрләренә тоташтыру, эшчәнлекнең аерым төрләрен лицензияләү һәм милек хокукын теркәү, җир кишәрлеген кадастр исәбенә кую һәм территориаль планлаштыруның сыйфаты кебек күрсәткечләр буенча эшне көчәйтергә кирәк. Татарстан Республикасы икътисадын үстерүне тәэмин итү өчен эшлекле климатны яхшырту турында Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов сөйләде.
ТР Төзелеш, архитектура һәм торак-коммуналь хуҗалык министры Марат Айзатуллин төзелешкә рөхсәт бирү процедураларының нәтиҗәлелеген бәяләүче күрсәткечләр һәм аларны яхшырту буенча тәкъдимнәр белән таныштырды. Үз чыгышында ул төзелешкә рөхсәт бирү процедураларын бирү вакытын кыскарту формаларының берсенең нәтиҗәлелеген арттыру максатыннан, хезмәт күрсәтүне электрон рәвешкә күчерү буенча Татарстан Республикасы цифрлаштыру министрлыгы белән уртак эш оештырылуын билгеләп үтте. Процедураларны оптимальләштерү, шулай ук төзелеш өлкәсендә хезмәт күрсәтүне «бердәм тәрәзә» режимында алуны тәэмин итә торган процессны автоматлаштыру өчен «Мин төзим» төзелешенә ярдәм итү платформасы булдырылды. Хезмәтләр физик затлар өчен дә, юридик затлар өчен дә ачык. «Мин төзим» платформасы пилотлары 2020 ел ахырында Татарстан Республикасының 2 районында (Әлмәт һәм Саба районнарында) эшли башлады. Төзелеш өчен рөхсәт алу өчен кирәкле процедураларның саны тагын бер күрсәткеч булып тора. 2020 елда Татарстан Республикасының шәһәр төзелеше эшчәнлеген тәэмин итү буенча дәүләт мәгълүмат системасы эшли башлады. Шәһәр төзелеше эшчәнлеге өлкәсендә 2 дәүләт һәм 9 муниципаль хезмәт буенча документларны электрон рәвештә әзерләү һәм раслау өлешендә дәүләт һәм муниципаль хезмәтләр күрсәтүне автоматлаштыру гамәлгә ашырылган. 2021 ел ахырына кадәр Татарстан Республикасының шәһәр төзелеше эшчәнлеген тәэмин итү мәгълүмати системасында тагын 7 муниципаль хезмәт күрсәтү функциясен гамәлгә ашыру планлаштырыла.