Май аенда Нокса елгасы янында парк төзи башлыйлар
2022 елда Нокса - «капризлы» шәһәр елгасын төзекләндерү буенча чаралар комплексы планлаштырылган. Май аенда аның ярларында парк төзелеше башланачак. Бу хакта ТР Төзелеш министрлыгында узган «түгәрәк өстәл» дә сөйләделәр. Чарада ТР Төзелеш, архитектура һәм ТКХ министрының беренче урынбасары Алексей Фролов, «ТР шәһәрләрен үстерү институты» фондының архитектура проектлары департаменты җитәкчесе Наилә Зиннәтуллина, «Ак Барс Девелопмент» компаниясе генераль директоры урынбасары Илья Лекарев, «Светлая долина» паркы проекты архитекторы Рүзәл Фәрхуллин катнашты.
Алексей Фролов билгеләп үткәнчә, Нокса янында үз проектларын гамәлгә ашыручы төзүчеләр яр буе территориясе белән бәйле мәсьәләләрне аңлый, җәяүлеләр маршрутларын өйрәнә.
Хәзер елга янында берничә торак комплекс урнашкан, балалар бакчалары һәм мәктәп төзелгән, икенче мәктәп быел актив төзелеш стадиясенә күчәчәк. Алексей Фролов сүзләренә караганда, төбәк җитәкчелеге ведомство алдына республика территориясен комплекслы төзү бурычын куйган. Торак төзелешен социаль һәм башка инфраструктура объектлары, шулай ук иҗтимагый киңлекләр алып барырга тиеш.
«Светлая долина» паркы проектының архитекторы Рүзәл Фәрхуллин 2022 елда паркта юллар челтәре төзеләчәген һәм яктырту урнаштырылачагын хәбәр итте. Тулаем алганда, аның сүзләренә караганда, «Светлая долина» паркы төзелешенең беренче чираты ял итү үзәген һәм кафе төзүне үз эченә ала, шулай ук воркаут һәм рекреация зоналары планлаштырыла. Икенче чират паркның үзәк өлешен колачлаячак, анда балалар мәйданчыгы, япмалы сәхнә һәм этләрне урамда йөртү зонасы төзеләчәк. Бөтен территория дәвамында бирегә килүчеләрнең су буенда йөрү мөмкинлеге булачак.
Архитектор сүзләренчә, яңа паркны «Яз» паркы белән Мамадыш тракты аша күпер астында велосипед һәм җәяүлеләр юллары хисабына берләштерү планлаштырыла.
Р. Фәрхуллин сүзләренә караганда, проектлаганда, кабатланмас өчен, күрше территорияләрдә планлаштырылган барлык функциональ зоналар исәпкә алынган.
Территориянең өстенлекләре арасында архитектор эре агачларның булуын билгеләп үтте. Аның сүзләренә караганда, Нокса территориясенең төп идеясе - табигатьне максималь рәвештә саклау.
Министрның беренче урынбасары хәбәр иткәнчә, төзелеш вакыты үзгәрмәячәк, чөнки проект бюджеты расланган инде.
“Бюджетлар һәм лимитлар расланды. Контрактлар һәм федераль ярдәм бар. Май бәйрәмнәреннән соң төрле юнәлештә эшне җәелдереп булыр дип уйлыйм. Мин бернинди чикләүләр дә күрмим”, - дип белдерде ул.