Казан Кремлендә республикада күптелле белем бирү комплексларын булдыру буенча киңәшмә узды
Казан Кремлендә Татарстан Дәүләт Киңәшчесе Минтимер Шәймиев “Адымнар” күптелле белем бирү комплексларын төзү һәм проектлау мәсьәләләре буенча киңәшмә уздырды.
Киңәшмә башланганда Минтимер Шәймиев билгеләгәнчә, “Яңарыш” республика фонды үзенең 10 еллыгын билгеләп, күптелле белем бирү комплексларын төзү проекты буенча үзенең эшчәнлеген дәвам итә.
“Билгеле булганча, агымдагы елда Алабугада һәм Казанда “Адымнар” мәктәбе ачылды һәм эшли башлады. Хәзер безнең максат - 2021 елга план төзү. Ул безнең өчен беренче сентябрьдән башланды”, - дип ассызыклады Минтимер Шәймиев.
Киңәшмәдә катнашучылар “Адымнар” шәһәр яны өстәмә белем бирү үзәге объектларын төзү, реконструкцияләү һәм капиталь төзекләндерү процессы турында фикер алыштылар. Әлеге объект “Ялкын” балаларны сәламәтләндерү лагеры базасында төзелә.
Киңәшмә барышында Лаеш районы башлыгы Илдус Зарипов киләчәктә Усад авылында зур торак комплексында күптелле белем бирү комплексы булдырырга тәкъдим итте. Ул күптән түгел районда яңа күптелле белем бирә торган балалар бакчасы эшли башлавын искәртте. Илдус Зарипов тәкъдиме буенча күптелле белем бирү комплексы 500 укучыга исәпләнгән мәктәп базасында ачылырга мөмкин.
Фикер алышканнан соң әлеге инициатива хупланды.
Киңәшмәдә ТР Премьер-министры урынбасары Ләйлә Фазлыева, ТР Дәүләт Советы урынбасары, “Яңарыш” республика фонды башкарма директоры Татьяна Ларионова, ТР мәгариф һәм фән министры вазифаларын башкаручы Илсур Һадиуллин, Казан шәһәре Башкарма комитеты җитәкчесенең беренче урынбасары Рөстәм Гафаров, ТР Баш инвестиция-төзелеш идарәсе директоры Марат Айзатуллин һәм башкалар катнашты.