ТР Министрлар Кабинетында республикада торак һәм социаль инфраструктура объектларын төзү программалары турында сөйләделәр

Татарстан Республикасында 2020 елның 27 мартына социаль ипотека, инвестицион күп фатирлы йортлар төзелеше, аз катлы торак төзелеше программалары буенча 780 мең кв. м торак файдалануга тапшырылган, ягъни бу – планның 26,2%ы.

Бүген бу белешмәләрне Татарстан Республикасы Хөкүмәте йортында узган республика киңәшмәсендә Татарстан Республикасы төзелеш, архитектура һәм ТКХ министры Фәрит Хәнифов китерде.

Киңәшмәне республиканың барлык муниципалитетлары белән видеоконференцэлемтә режимында Татарстан Республикасы Президенты Рөстәм Миңнеханов уздырды. Киңәшмәдә Татарстан Республикасы Премьер-министры Алексей Песошин да катнашты.

Фәрит Хәнифов искәрткәнчә, быел ведомство 6 илкүләм проектны гамәлгә ашыруда катнашачак: «Демография», «Торак шәһәр һәм тирәлеге», «Экология», «Мәгариф», «Сәламәтлек саклау» һәм «Мәдәният».